Časta ŭ pieraškodach, što sustrakajucca na našym žyćciovym šlachu, my vinavacim
retrahradny Merkuryj. Zališniaja aktyŭnaść niepryjacielaŭ tradycyjna źviazvajecca z
poŭniaju. A asablivyja vyprabavańni vypadajuć tym, chto narodžany pad adpaviednaj
płanidaj. Zrešty, usie hetyja pierakanańni słušnyja, bo niabiesnyja abjekty isnujuć, i
istotny ŭpłyŭ jany majuć na losy nia tolki ludziej paspalitych, ale i cełych krainaŭ.
— Jość rečy, jakija pradpisvajuć toje, čym treba zajmacca, – ličyć astralahinia Natalla Śliž. –
Kažuć, što na maładzik dobra stryhčy vałasy, kab raśli. Kali vietach, to ŭžo nia treba. Tolki kali
vy pierabłytali fazy, to heta ŭžo vaša prablema. Tak i tut: vy možacie žyć z hetym, vy možacie
ŭličvać heta, možacie nia ŭličvać, Merkuryj isnuje i pracuje tak, jak jamu chočacca. A jak u vas
adbyvajecca, uličyli vy heta ci nie, heta vaša asabistaja sprava. Ale nia treba vinavacić planety
ŭ ich isnavańni.
Haradzienka Natalla Śliž niekalki hadoŭ zapar biare čynny ŭdzieł u Mižnarodnym kanhresie
daśledčykaŭ Biełarusi, jaki adbyvajecca ŭ Litvie. Niezdarma, bo Natalla Śliž – navukoŭca.
Stupieni kandydatki histaryčnych navuk jana dasiahnuła, vyvučajučy nieardynarnuju temu –
mižpołavyja stasunki ŭ Vialikim kniastvie Litoŭskim.
Hłybokija viedy ŭ historyi krainaŭ našaha rehijonu dapamahli Natalli Śliž znajści siabie ŭ
novym ampłua. Ad paraŭnalna niadaŭniaha času daśledčyca ščylna zajmajecca astralohijaj.
Pavodle daśledčykaŭ, astralohiju ličać navukaj, vartaj davieru, 70 adsotkaŭ ludziej zachodniaj
kultury. I zusim nie daremna, miarkuje Natalla Śliž.
— Ja liču, što heta navuka, i nichto mnie nie dakazaŭ advarotnaha, – adsiekła Natalla Śliž. –
Tyja ludzi, jakija ni razu ničoha nie pračytali, jany nia mohuć arhumentavać, ź jakimi
astralahičnymi tezami jany nia zhodnyja. Što, nie isnuje planet? Nie isnuje sonca? I hetak dalej.
U astralohii raźbiracca – heta vyšejšaja navuka.
Nazirać za niabiesnymi abjektami i šukać adpaviednaści pamiž ichnym raźmiaščeńniem na
niebaschile i žyćciovymi perypetyjami ludzi pačali ŭ hłybokaj staražytnaści. Antyčnyja daktary
kansultavalisia z astrolahami ŭ spravie lačeńnia ludziej. Dobra abaznanym u astralohii byŭ i
biełaruski i vialikalitoŭski pieršadrukar Francišak Skaryna. Vyjavy niabiesnych ciełaŭ jon zrabiŭ
svaim znakamitym symbalem.
— Dla mianie astralohija – heta cudoŭny napramak dla samaraźvićcia. Tamu što toje, što my
atrymlivajem, naš haraskop – heta naš resurs. Jon pakazvaje našyja mocnyja i słabyja baki, i jak
z hetym žyć i pracavać. Ja sabie rablu prahnozy ŭvieś čas. Ja hladžu, kali ŭ mianie
niebiaśpiečnyja sytuacyi, kali ŭ mianie adčyniajucca sytuacyi, kali ja mahu niešta zrabić. Kali,
naprykład, lepiej zaniacca svaim zdaroŭjem. Kali lepiej zaniacca svajoj karjeraj. Ja realna ŭvieś
čas hetym zajmajusia, – zapeŭniła astralahinia.
Svoj dośvied u astralohii Natalla Śliž pastanaviła prymianiać i ŭ dačynieńni da inšych ludziej,
arhanizacyjaŭ i navat krainaŭ. I ŭ hetym joj spryjajuć viedy pa asnoŭnaj specyjalizacyi.
Daśledčyca miarkuje: dla taho, kab pravilna prahnazavać budučyniu, treba dobra viedać
minułaje.
— Dla krainy heta bolš składana, bo treba mieć histaryčnuju adukacyju i razumieć matyvy
hetaj krainy. Tamu što nielha ŭziać haraskop luboj krainy i raskazać jaho. Tamu što kali ty nia
viedaješ histaryčnuju sutnaść hetaj krainy, jaje karani, što adkul idzie, ty budzieš kazać
hłupstva, – upeŭnienaja Natalla Śliž. – Zaŭsiody treba viedać historyju hetaj krainy i palityčnuju
sytuacyju, i prytym nia tolki haraskop krainy. Treba viedać viadučych asobaŭ u hetaj halinie. Kali
vy chočacie niedzie niešta pryniać, pravieści reformy, heta taksama treba ŭmieć: vybrać
pravilnuju datu, pravilny momant, kali heta treba zrabić. Nu, voś apošni prykład – mabilizacyja:
jaje abviaščeńnie było abranaje ŭ vielmi niapravilny peryjad. I vy bačycie vyniki.
Natalla Śliž miarkuje, što niapravilnaje razumieńnie pryrodnych zakanamiernaściaŭ moža stać
pryčynaju pryniaćcia drennych rašeńniaŭ. Pahatoŭ na dziaržaŭnym uzroŭni, kali pryniatyja
pastanovy istotna ŭpłyvajuć na žyćcio krainaŭ-susiedak. Pravilna-ž razumieć zakony suśvietu
pieraškadžajuć raznastajnyja navukovyja abłudy. Letam 2022 hodu Rasiejski centar vyvučeńnia
hramadzkaha mierkavańnia pravioŭ sacyjalahičnaje apytańnie. Pavodle jahonych vynikaŭ, 35
adsotkaŭ žycharoŭ Rasiei ŭpeŭnienyja: nie Ziamla krucicca vakoł Sonca, a Sonca – vakoł
Ziamli. Pry hetym, pavodle dadzienych 2018 h., try pracenty rasiejskaha nasielnictva, a heta
amal čatyry z pałovaj miljona čałaviek, ličyli, što Ziamla – plaskataja. Natalla Śliž sprahnazavała,
što čakaje žycharoŭ Litvy i Biełarusi, a taksama inšych krainaŭ našaha rehijonu ŭ bližejšyja
hady.
— Naohuł ničoha dobraha nie mahu skazać, – uzdychaje astralahinia. – Perspektyvy – kali my
pieražyviem hetyja dva hady – bolš-mienš prymalnyja perspektyvy nia tolki dla rehijonu
pačnucca ŭ rajonie 2025 hoda. Ciapier usie ŭsio zrabili, kab my ŭvajšli ŭ samy hłyboki i samy
ciažki kryzys. Bo na hety hod ja rabiła prahnazavańnie, i ja ŭbačyła, što dva hady budzie
funkcyjanavać taki momant, jak epidemija psychičnych zachvorvańniaŭ. I voś my heta bačym:
nieadekvatnyja palityčnyja rašeńni, nieadekvatnyja pavodziny ludziej – my heta budziem bačyć
roŭna dva hady. Adpaviedna, praz heta budzie nieadekvatnaść va ŭsich sytuacyjach. Luby
kryzys možna, kaniešnie, prachodzić pa-roznamu, ale ludzi, jak zaŭsiody, buduć vybirać samy
drenny varyjant. I kali viartacca da tendencyj, u dzievianostyja hady heta była repetycyja, zaraz
asnoŭnaja častka. U palitycy budzie źmiena palityčnych uładaŭ usiudy. Da 2025 hoda ŭvohule
palityčnyja režymy praktyčna ŭsiudy pamianiajucca. I ŭ Eŭrapiejskim rehijonie, i ŭ Biełarusi.
Tendencyi buduć takija, što ŭsio, što my nažyli ŭ 20 stahodździ, toje idzie na złom. Heta značyć,
my žyviem na złomie epoch. Kardynalnym. I prosta tak heta ŭžo nia projdzie.
Na dumku astralahini, spadziavacca na zakančeńnie heapalityčnaj turbulentnaści ŭ našym
rehijonie možna tolki paśla taho, jak usie jahonyja častki buduć samastojnymi i niezaležnymi, sa
svajoj palitykaj, pazbaŭlenaj źniešniaha ŭpłyvu. Źjaŭleńnie na mapie śvietu novaha Mižmorja
pryniasie ŭ rehijon spakoj i stabilnaść, miarkuje Natalla Śliž.
— Buduć pieradzieły miežaŭ, – skazała astralahinia. – Tak, jak u nas zaraz, eŭrapiejskija krainy
i krainy našaha rehijona – u tych miežach my nie zastaniemsia. I sam rehijon budzie
pierafarmatavany. I nakolki ja razumieju, adnaŭleńnie idejaŭ Vialikaha kniastva Litoŭskaha ŭ
budučyni budzie. Rehijon usiaho Vialikaha kniastva Litoŭskaha pavinien stać samastojnym
rehijonam, jaki nie ŭvachodzić nikudy. Tamu što Eŭraźviaz nia budzie isnavać u tym stanie, u
jakim jon budzie isnavać, a bałtyjskija krainy buduć adyhryvać istotnuju rolu. I tamu pavinien
sfarmiravacca hety samastojny rehijon. Ale heta nastanie nia siońnia. Naohuł hety novy peryjad
prychodzić bolš čym na 100 hadoŭ. Ja baču tut niestabilnaści i kanflikty, jakija mohuć pajści
roznymi šlachami. I zaležyć heta znoŭ-ža ad našaha psychičnaha stanu: “karanavirus
hałaŭnoha mozhu” nichto nie admianiaŭ. Mnohija ludzi nervovyja, niestabilnyja, i realna byvaje
tak, što dla jakoj-niebudź napružanaj sytuacyi nie chapaje adnaho maleńkaha šturšku, i ŭsio –
paniesłasia. Ciapier idzie pieryjad mocnaj niestabilnaści. I ŭsio, što ja mahu paraić, – heta
pryvykać i nia dumać, što ŭsio budzie dobra, a radavacca, što vy jašče žyvyja na siońniašni
dzień.